Goran Ivanišević je odlučio da se oglasi nakon Australijen opena i da progovori o Novaku Đokoviću i izdanju u Melburnu.

Istakao je da je čitav tim bio svjestan da će Đoković u jednom trenutku morati da bude poražen u Melburnu, ali mu se nije dopao način na koji se to desilo.

“Nije ništa toliko tragično. Prije ili kasnije morao je da izgubi, toga smo svi bili svjesni. Šteta samo što je to bilo na ovakav način, ali protiv Sinera ako nisi 100 posto nemaš šta da tražiš. Pa čak i kad jesi na 100 posto, opet možeš izgubiti. Međutim, cijeli Australijan open nekako nije bio pravi za Novaka, od prvog kola pa nadalje. Ali dobro, idemo dalje, nije ništa toliko tragično”, kazao je Ivanišević za “Jutarnji”.

Istakao je da Đoković nije imao problem sa laktom, već da jednostavno to nije bio njegov dan.

“Bio je zdrav. Lakat? Ne, nije mu ništa smetalo, bio je zdrav, ali jednostavno nije išlo… Može se i njemu desiti, i on je od krvi i mesa. S druge strane, ako je od nekoga trebalo da izgubi, onda mi je drago da je to bilo od Sinera”, dodao je Ivanišević i objasnio da je od Đokovića dobio “mjesec dana slobodno”.

To je bio plan od početka sezone, na to nije uticao poraz u Melburnu i istakao je da će se Novak vratiti za Indijan Vels.

Pet godina nije igrao Đoković na ovom turniru koji je osvojio pet puta u karijeri, bit će mnogo specifičnosti u novom izdanju pogotovo što Nole može da dođe do čak 1.000 novih bodova.